എന്തു കൊണ്ടാണ് പള്ളിയുടെ നടുവിൽ നടയ്ക്ക് നേരെ കുർബാന സമയത്ത് ആരും നിൽക്കാത്തത്? അവിടെ എന്തിനാണ് പ്രത്യേക തരത്തിലുള്ള പായ വിരിക്കുന്നത്? എന്തിനാണ് മരിച്ചവരെ ഓർമ്മിക്കുമ്പോൾ ഹൈക്കലായുടെ നടുവിൽ വിരിപ്പ് വിരിക്കുന്നത്? എന്തിനാണ് പള്ളിയിൽ മൃതദേഹം ഹൈക്കലായുടെ നടുവിൽ പ്രതിഷ്ഠിക്കുന്നത്?

എല്ലാ സഭകളിലും പള്ളിയുടെ മധ്യഭാഗം ഒഴിച്ചിടാറുണ്ട്. പ്രത്യേകിച്ച് സുറിയാനി ഓർത്തഡോക്സ് സഭയിൽ. ആരാധനാ സമയത്ത് സാധാരണയായി അവിടെ ആരും നിൽക്കാറില്ല. അവിടെ പ്രത്യേക നിറമുള്ള പായയാണ് (ചുവപ്പ്) വിരിക്കാറുള്ളത്. മരിച്ചവരുടെ ഓർമ്മയിൽ സാധാരണയായി നടുവിലാണ് ധൂപം വീശാറുള്ളത്. അപ്പോൾ ഈ ഭാഗത്തിനു അസാധാരണയായി എന്തോ പ്രത്യേകതയുണ്ടെന്നുള്ളത് വ്യക്തമാണ്.

എന്താണ് ഈ പ്രത്യേകത?

വിശുദ്ധ കുർബാനയിൽ ജീവിച്ചിരിക്കുന്നവരും മരിച്ചുപോയവരും സ്വർഗ്ഗീയരും മാലാഖാമാരും പങ്കെടുക്കുന്നു എന്നാണ് സഭയുടെ വിശ്വാസം. മാലാഖമാരും സ്വർഗ്ഗീയരും മദ്ബഹായിലും ഹൈക്കല (ഭൂമി) യിൽ ഭൗമീകരും (ജിവിച്ചിരിക്കുന്നവരും) ഹൈക്കലായുടെ മധ്യത്തിൽ മരണപ്പെട്ടവരും നിലകൊള്ളുന്നു എന്നാണ് സഭയുടെ വിശ്വാസം. ത്രോണോസ് (ബലിപീഠം) മുതൽ ബീമ്മാ വരെയുള്ള ഭാഗം 'സ്കാക്കോന' എന്നാണ് അറിയപ്പെടുന്നത്. അതായത് യാക്കോബ് സ്വപ്നത്തിൽ ദർശിച്ച, മാലാഖമാർ സ്വർഗ്ഗത്തിലേക്ക് കയറിപ്പോകുന്ന ഗോവേണിയാണ് ഈ സ്കാക്കൊന. ഇതിന്റെ തുടർച്ചയായി ഹൈക്കലയിൽ കാണപ്പെടുന്ന ഈ മധ്യഭാഗം നമ്മുടെ മരിച്ചുപോയവർ സ്വർഗ്ഗത്തിലേക്ക് കയറിപ്പോകുന്ന ഗോവേണിയായിട്ടാണ് സഭ കരുതുന്നത്. അതുകൊണ്ടാണ് ഈ ഭാഗം മരിച്ചുപോയവർക്കുവേണ്ടി മാറ്റി വച്ചിരിക്കുന്നത്. അവർ വിശുദ്ധ കുർബാനയിൽ ഈ ഭാഗത്ത് നിന്നുകൊണ്ട് പങ്കെടുക്കുന്നു എന്നാണ് സഭ വിശ്വസിക്കുന്നത്. അവരുടെ സ്മരണയ്ക്കായി സാധാരണ ഒരു കെടാവിളക്ക് അവിടെ വയ്ക്കാറുണ്ട്.

ഫാ.ഗീവർഗ്ഗീസ് കോശി പുത്തൻവീട്ടിൽ, പട്ടാഴി.