ആരാണ് മൗദ്യാനന്മാർ?

യേശുക്രിസ്തുവിലുള്ള വിശ്വാസം ഏറ്റുപറഞ്ഞതു മൂലം പീഡനങ്ങൾ സഹിച്ചവരും പിന്നീട് രക്തസാക്ഷിത്വം പ്രാപിക്കുകയോ ചെയ്ത വിശുദ്ധരാണ് മൗദ്യാനന്മാർ.

എന്തുകൊണ്ട് ഹേവോറെ വെള്ളിയാഴ്ച സകല മൗദ്യാനന്മാരുടെയും ഓർമ്മ സുറിയാനി സഭ ആചരിക്കുന്നു?

പരിശുദ്ധ സുറിയാനി സഭയിലെ പൗരസ്ത്യ കാതോലിക്കായായിരുന്നു മോർ ശെമ്ഓൻ ബർസാബാ. ഇറാനിലെ ശാപ്പോർ രണ്ടാമൻ രാജാവിന്റെ ഭരണകാലത്ത് എ.ഡി. 345 ലെ മതമർദ്ദന വേളയിൽ അദ്ദേഹം രക്തസാക്ഷിയായി. രാജകല്പന അനുസരിച്ച് സൊരാസ്ത്രിയൻ മതവിശ്വാസം സ്വീകരിക്കാൻ വിസമ്മതിച്ചതിനാൽ  നൂറ് മെത്രാന്മാരും അനേകം പുരോഹിതന്മാരും ഉൾപ്പടെ പതിനാറായിരത്തോളം വിശ്വാസികൾ അന്ന് കൊല്ലപ്പെട്ടു എന്ന് രേഖപ്പെടുത്തപ്പെട്ടിട്ടുണ്ട്. ഈ സംഭവം നടന്നത് ഒരു ദുഃഖവെള്ളിയാഴ്ച ദിവസം ആയിരുന്നു. ഉയിർപ്പ് പെരുന്നാൾ കഴിഞ്ഞു വരുന്ന വെള്ളിയാഴ്ച (ഹേവോറെ ആഴ്ചയിലെ വെള്ളിയാഴ്ച) പൊതു സുറിയാനി പാരമ്പര്യം അനുസരിച്ച് സകല മൗദ്യാനന്മാരുടെയും ഓർമ്മ ആചരിക്കുന്നത് ഇവരുടെ ഓർമ്മ അനുസ്മരിക്കുന്നതിന് വേണ്ടിയാണ്. ദുഃഖവെള്ളിയാഴ്ച  മറ്റു ഓർമ്മകൾ ആചരിക്കുന്നത് അനുചിതമായതിനാൽ അവരുടെ ഓർമ്മ സകല മൗദ്യാനന്മാരുടെയും ഓർമ്മയായി ഉയിർപ്പ് ഞായർ കഴിഞ്ഞ് വരുന്ന ഹേവോറെ വെള്ളിയാഴ്ച ആചരിക്കുന്നു.

സുറിയാനി സഭയിൽ മോർ ശെമ്ഓൻ ബർസാബായുടെയും സഹസഹദേന്മാരായ നൂറ് എപ്പിസ്കോപ്പമാരുടെയും കശിശാമാരുടെയും വിശ്വാസികളുടെയും ഓർമ്മ ഏപ്രിൽ 14ന് പ്രത്യേകമായും ആചരിക്കുന്നുണ്ട്.