മോർ അഫ്രേമിന്റെ ശിഷ്യനായിരുന്ന മോർ ബാലായി സുറിയാനി ഭാഷയിലെ മറ്റൊരു പ്രധാന എഴുത്തുകാരനായിരുന്നു. അദ്ദേഹത്തിന്റെ ജനന-മരണ കാര്യങ്ങൾ കൃത്യമായി രേഖപ്പെടുത്തിയിട്ടില്ല. നാലാം നൂറ്റാണ്ടിന്റെ അവസാനവും അഞ്ചാം നൂറ്റാണ്ടിന്റെ ആദ്യ പകുതിയിലുമായി ജീവിച്ചിരുന്നു എന്നു കരുതപ്പടുന്നു. മോർ അഫ്രമിനെപ്പോലെ തനതായ ശൈലി അദ്ദേഹം ഉപയോഗിച്ചിരുന്നു. നർമ്മ ഭാവത്തോടെ എഴുതുവാനുള്ള കഴിവ് മോർ ബാലായിയുടെ കവിതയിൽ കാണാം. അഞ്ചക്ഷരകാലത്തിലാണ് (Penta syllabic) എഴുതിയിരിക്കുന്നത്. എന്നാൽ ചില കവിതകൾ നാലക്ഷരകാലത്തിലും (Tetra syllabic) എട്ടക്ഷരകാലത്തിലും (Octa syllabic) കാണുന്നുണ്ട്. സുറിയാനി സഭയിലെ മിക്കവാറും എല്ലാ ആരാധനകളിലും മോർ ബാലായിയുടെ കവിതകളുണ്ട്. സിറിയായിലെ ആലപ്പോ എന്ന സ്ഥലത്തെ കോർ-എപ്പിസ്ക്കോപ്പാ ആയിരുന്നുവെന്ന് ചില ചരിത്ര പുസ്തകങ്ങളിൽ രേഖപ്പെടുത്തിയിരിക്കുന്നു.