ഊറാറ.

ഒരു പൗരോഹിത്യ അംശവസ്ത്രമാണ് ഊറാറ. ശെമ്മാശന്മാർ മുതൽ മുകളിലേക്കുള്ള പട്ടത്വസ്ഥാനികൾ ധരിക്കുന്നു. സ്ഥാനത്തിനനുസരിച്ചു ഊറാറയുടെ ആകാരത്തിനും ശരീരത്തിൽ ചാർത്തുന്ന രീതിക്കും വ്യത്യാസമുണ്ട്.

'ഊറാറ' എന്ന വാക്കിനു തത്തുല്യമായ ഒരു  ഇംഗ്ലീഷ് പദമാണ് സ്റ്റോൾ. STOLE എന്നതിന് 'ഷാൾ' എന്നും വേണമെങ്കിൽ അർത്ഥം പറയാം. പണ്ട് മലയാള നാട്ടിലും ദേശത്തുള്ള  മറ്റു രാജഭരണ പ്രദേശങ്ങളിലും പ്രഭുക്കന്മാരും പ്രമാണിമാരും ധരിച്ചിരുന്ന നേര്യതും രണ്ടാം മുണ്ടുമൊക്കെ പ്രൗഢിയുടെ ലക്ഷണമായിരുന്നു, അവകാശവുമായിരുന്നു. അധികാരത്തിന്റെ അടയാളമായിരുന്നു.

സ്ത്രീകൾക്കും വിവിധ രീതിയിലുള്ള മേൽ വസ്ത്രങ്ങളുണ്ടായിരുന്നു. ഇന്നും അനുമോദന വേളകളിൽ വ്യക്തികളെ ആദരിക്കുവാനും ബഹുമാനിക്കുവാനും ഷാളുകൾ ആണല്ലോ അണിയിക്കുക.

ഊറാറ എന്ന വാക്കിന്റെ ഉത്ഭവം ORARION അല്ലെങ്കിൽ ORARIUM എന്ന ലത്തീൻ പദത്തിൽ നിന്നായിരിക്കണം. മതപീഡനം അവസാനിച്ചപ്പോൾ റോമാ സഭയിലെ പുരോഹിതരെ ചക്രവർത്തിയുടെ ഉദ്യോഗസ്ഥരായി നിയമിക്കുക പതിവായിരുന്നു. അപ്പോൾ അവരുടെ സ്ഥാനത്തിനൊത്തവണ്ണമുള്ള ഷാളുകൾ വിവിധ സ്റ്റൈലുകളിൽ അണിയിക്കുക പതിവായിരുന്നു. അതിൽ നിന്നാണ് മിക്കവാറും പുരോഹിതസ്ഥാനികളുടെ VESTMENTS - നു തുടക്കം എന്ന് പണ്ഡിതമതം.

ഊറാറ മാലാഖമാരുടെ ചിറകുകളെ  സൂചിപ്പിക്കുന്നുവെന്നു മോർ ക്രിസോസ്‌റ്റം.

ഊറാറ കഴുത്തിൽക്കൂടെയോ തോളിനു മുകളിലോ മാത്രമേ ധരിക്കുവാൻ പറ്റുകയുള്ളൂ. അത് ധരിക്കുന്നയാൾക്കു ഒരു നുകം പോലെയാകുന്നു. ത്യാഗത്തിന്റെയും ചുമടു ചുമക്കുന്നതിന്റെയും പ്രതീകമെന്ന് മറ്റു ചിലർ. കർത്താവ് ശിഷ്യന്മാരുടെ കാൽ കഴുകിയപ്പോൾ ഉപയോഗിച്ച അരക്കച്ചയുടെ പ്രതീകമെന്ന് വീണ്ടും മറ്റു ചിലർ.

ഏന്തൊക്കെയായാലും ഊറാറ ധരിക്കുമ്പോൾ ചൊല്ലേണ്ട പ്രാർത്ഥന സൂചിപ്പിക്കുന്നത് മറ്റൊന്നാണ്.

കർത്താവേ! യുദ്ധത്തിൽ ശക്തി കൊണ്ട് എന്നെ അരകെട്ടിക്കുകയും എനിക്ക് വിരോധമായി നിൽക്കുന്നവരെ എന്റെ കീഴിൽ മുട്ട് മടക്കിക്കുകയും ചെയ്യണമേ.