കൂദാശകളുടെ രാജ്ഞിയെന്നാണ് വി.കുർബാനയെ സഭാ പിതാക്കന്മാർ വിശേഷിപ്പിക്കുന്നത്. വിശുദ്ധ കുർബാനയിലുപയോഗിക്കുന്ന അപ്പം കർത്താവിന്റെ ശരീരമായും, വീഞ്ഞ് കാൽവരിയുടെ മലമുകളിൽ നമുക്കായ് ചിന്തപ്പെട്ട അവിടുത്തെ രക്തമായും വിശുദ്ധ കുർബാനയിൽ രൂപാന്തരീകരണം പ്രാപിക്കുന്നു. മനുഷ്യപുത്രന്റെ ശരീരം ഭക്ഷിക്കാതെയും അവിടുത്തെ തിരുരക്തം പാനം ചെയ്യാതെയുമിരുന്നാൽ നിത്യജീവൻ പ്രാപിക്കുകയില്ലെന്ന് തിരുവചനം നമ്മെ ഓർമ്മിപ്പിക്കുന്നു.
സഭകളുടെ മാതാവെന്ന പേരിൽ അറിയപ്പെടുന്ന പരി.സുറിയാനി സഭയിൽ ഉപയോഗിച്ച് വരുന്ന വിശുദ്ധ കുർബാനയപ്പത്തെ നാം പഠന വിധേയമാക്കുകയാണെങ്കിൽ 12 ഗോപുരങ്ങളും , 12 കുരിശും കാണുന്നു. കർത്താവിന്റെ 5 തിരുമുറിവുകളെ സൂചിപ്പിക്കുന്ന 5 സുഷിരങ്ങൾ അകത്തെ വൃത്തിൽ ക്രൂശ് ആകൃതിയിൽ കാണാനാകും.
നിത്യജീവന്റെയും, രക്ഷയുടെയും മർമ്മകൾ ഉൾക്കൊള്ളുന്നവയും കുഞ്ഞാട് അതിന്റെ നിത്യ വെളിച്ചമായിരിക്കുന്ന സ്വർഗ്ഗീയ ഊർശ്ലേമിന്റെ 12 അടിസ്ഥാനങ്ങളേയും, 12 ഗോപുരങ്ങളെയും ഓർമ്മിപ്പിക്കുമാറ് 12 ഗോപുരങ്ങളാലും 12 കുരിശുകളാലും മുദ്രണം ചെയ്യപ്പെട്ടതുമാണ്.
അപ്പം (അമീറ) ചുട്ടെടുക്കുന്നത് ശുദ്ധിയോടെ വേണമെന്നതിനാൽ
വൈദികരോ ദൈവാലയത്തിലെ പ്രധാന ശുശ്രൂഷകനോ അല്ലെങ്കിൽ ശുശ്രൂഷകരോ മാത്രമാണ് അപ്പം ചുടാറുള്ളത്. ഇതിനെ നാടൻ ഭാഷയിൽ 'അടിച്ചുകാച്ചൽ' എന്നു വിളിക്കുന്നു.
സുറിയാനി സഭയുടെ വിശ്വാസ പ്രകാരം അപ്പം ഖണ്ഡിപ്പും ശരീര രക്തങ്ങളുടെ കലർത്തലും വഴി ഇവയിൽ ഏതെങ്കിലും ഒന്ന് മാത്രം അനുഭവിച്ചാൽ മതിയാകും എന്നാൽ ഖണ്ഡിപ്പിന്റെ ശുശ്രൂഷയാകുന്ന ശരീര രക്തങ്ങളുടെ കലർപ്പു കൂടാതെ ശരീരം മാത്രമോ രക്തം മാത്രമോ വിശ്വാസികൾക്ക് നൽകാൻ പാടില്ല.
അവലംബം : സി.എ.നെനാൻ 2002 ലെ മോർ കൂറിലോസ് സോവനീയറിൽ എഴുതിയ യാക്കോബായ സുറിയാനി സത്യവിശ്വാസ സഭയിലെ വിശുദ്ധ കൂദാശകൾ എന്ന ലേഖനത്തിലെ വി.കുർബാനയപ്പം എന്ന ഭാഗം.
ഫാ.ഗീവർഗ്ഗീസ് കോശി പുത്തൻവീട്ടിൽ, പട്ടാഴി.